|
20110310自由時報
駛公務車輔選出車禍，叫全民替in某祈禱，有夠感性。今也台中市大火燒，別人的囝死袂了，佫叫人mai「情緒化」，啥物道理？亦敢講：「我也想知道大火原因。」干但會曉開人民的錢出國遊覽，連火燒的原因都呣知，考察考假的、市長嘛做假的！取一枝喙烏龍踅桌，騙痟的，唬人，袂過手啦！
兩岸未來定位，總統講：「未思考。」大位坐益未三冬，「會佫花」 kham頭kham面捎咧一直簽，台灣主權予伊挈去「送肉飼虎」去了了，竟然連好好仔思考都無，總統做假的是否？騙鬼食牛肚湯，(左手右官)籃仔假燒金啦！
明明是政權輪替了後，油價一每起徦到，害人民(左手右官)桶仔去加油，目睭皮無漿泔（睜眼說瞎話）佫敢推予前朝的民進黨，真正是痞年冬厚痟人，共百姓當做戇人。呰款政府，大官虎會曉開人民的錢享受，三年官兩年滿，食徦油洗洗。拄著代誌用騙的，家己騎馬，家己喝路，「自我感覺良好」。
秦檜陷害岳飛，出賣大宋江山的時，敢想會到有一工會變做銅人予眾人漩？予人慼徦做「油炸檜」拆食落腹？恐驚台灣人有一工連欲漩都無地漩，到時欲哭無目屎就可憐代囉！
（作者鄭兆祥 為台語教師）
| 
