首頁 arrow 自由論壇 arrow 史明老師隨行日記 20140717
史明老師隨行日記 20140717
新聞報導 -
作者 chiongeeng 顏贊賀   
2014-07-17

我所熟似—史明 おじさん;
炒麵的革命家—史明 おじさん

(台語文,羅馬拼音是教羅白話字)

史明おじさん在1993年轉來台灣,彼陣黑名單(給國民黨禁止入境海外異議人士)開放(1992年5月)無偌久,大家攏非常注意這个事志,看閣有什麼人對海外轉來台灣。講是開放黑名單,毋閣國民黨的爪扒仔猶是成囂俳(hiau-pai)、聳鬚,攏嘛無插潲(chhap-siâu)法律的規定,若有人對海外轉來台灣攏會派人監視合蒐證翕相。おじさん對日本倒轉來攏無停睏,翻轉年(1994)伊就來台中演講(在本土文化冊局);會記得彼个所在細細兮,內面篋(kheh)無偌濟人。伊講著台灣400年歷史、台灣是殖民地,誠認真宣傳伊的理念,予我印象真深。閣來伊有一的組織就是「獨立台灣會」嘛咧開始招兵買馬。おじさん在日本東京有一間店,日時佇樓跤炒麵暗時佇樓頂寫冊做革命。"手那(ná)炒麵那舞革命,做革命的人袂用得有家庭"伊按呢講。這兮情操毋是普通人做會到的。

這是我頭一擺聽おじさん咧演講,彼當陣伊咧講話會大心氣(上氣不接下氣),就是心臟較無力,而且伊的腔口我一時聽袂慣勢,聽著成吃力,毋過看おじさん伊咧拚命演講的精神合咧講話的態度,會予你足感動咧。講著對おじさん咧演講哪會遐有興趣咧?伊在日本咧做台灣獨立革命運動的時,一寡風聲定定會傳入來台灣;國民黨定會放風聲講"在什麼所在閣有咧暴動,抑是什麼設施建設去予人破壞、去予人共創掉……",這ê事志攏嘛有おじさん的份。雖罔おじさん受著的基礎教育是日文,毋閣伊對漢文合英文嘛會通。若講伊彼本大著作《台灣人四百年史》,立意明瞭、資料詳細、嚴格謹慎的考證無人綴(跟)會著,會用得講研究對社會主義到從事台灣獨立這條路思想最好的冊。

國民黨的抓扒仔上驚的(ê)就是おじさん的獨立台灣會,便若有發生重大的政治案件,抑是看著特殊的記號,親象一个戴雞笠仔的人頭記號,合一个箭頭的記號,國民黨的走狗合媒體攏會共放大到成恐怖,袂輸兮阿共欲拍過來咧。後來我去查資料才知影彼是おじさん的註冊商標「獨立台灣會」in(他們)的傑作,所以國民黨的抓扒仔不管在佗位看著彼个おじさん的註冊商標,攏大驚小怪當作又閣大功一件,想起來嘛成好笑。

閣來台灣若有什麼政治活動攏會看著in,親象在2005/4/26 連戰這隻大奴才欲去中國見in祖公,在臭頭機場(桃園機場)的路哩(lih)共in放炮,去予國民黨起訴判刑彼層事志;in共伊合助理硞起來在咧審判的時,おじさん講伊規个擔起來。開庭的時法官咧共問,而おじさん尻川(kha-chhng)向法官" 恁這兮走狗兮,恁爸咧舞革命的時恁猶未出世咧",法官無辦法就予伊交保。おじさん敢做敢當,在90歲啊猶毋驚死的勇氣使人敬佩。おじさん講:愛台灣無罪!

願台灣神保佑おじさん身體康健。

(chiongeeng 顏贊賀,撰於2014/07/17)


延伸閱讀:
史明老師隨行日記系列
Su Beng-史明粉絲頁
永遠的革命者史明與獨立台灣會


分享:Facebook! Plurk! LINE send!  
  
最後更新 ( 2014-10-08 )
 
< 前一個   下一個 >
© 2022 財團法人台灣大地文教基金會 - 台灣人拜台灣神 不做無根之民
Joomla!是基於GNU/GPL授權的自由軟體. 中文版本由TaiwanJoomla製作.