|
#20240316對囡仔講台語活動紀錄
活動: 台灣聖山司法改革先鋒王育霖檢察官開像追思會佮台語詩比賽頒獎活動紀錄
對囡仔講台語(台中台語囡仔伴)受活動主辦台灣大地文教基金會邀請參加台灣聖山生態教育園區盛會。
這是台中台語囡仔伴頭一遍去到聖山，hia栽有各種樹木、有青翠ê菜園，恬靜自在。中晝tiàm食堂chia̍h自助米粉炒、青菜、粽、雜菜湯等簡單好食的料理，菜蔬是聖山家己種ê，清甜好滋味！
食飯飽，徙去會場經過一chōa長長ê步道，ná聽鳥仔聲ná看一欉閣一欉ê樹栽佮花草，齊顧kah好勢á好勢，誠清心。
活動tú開始唱歌詩，台中囡仔伴較厚性情ê家長就開始懷想過去各台灣先鋒，in的精神隨个á隨个伴佇聖山chia，佮逐家鬥陣。
主辦人真用心，kā「對囡仔講台語 Tùi gín-á kóng Tâi-gí」掛Tâi-oân-jī(白話字)照刊起lih活動手冊，嘛有簡介紹hō͘眾人知：
「對囡仔講台語 Tùi gín-á kóng Tâi-gí：做伙來對囡仔講台語，做陣keng一个台語ê環境晟養Tâi-oân囡仔。爭取母語受教權，栽培用台灣話思考ê頭殼。組織在地ê共學團體，hō͘囡仔自由𨑨迌、用台灣話吸收智識、冤家相拍交朋友。」
--
這場活動上主要是beh紀念王育霖，也是紀念228的受難者。台灣人受中國政府迫害，失去濟濟菁英，失去台灣話的話語權，用台灣話來舉辦活動是轉型正義必要的元素。
較可惜的是，受中國語教育影響，講台灣話hông侮辱ê烏影，深深印佇濟濟台灣人心內，為著莫予囡仔受仝款的烏影的心理，活動會場猶是有一寡人，見著囡仔就「越頭症」上身，對囡仔講中國話，直接予囡仔成做中國人，失去做台灣人的機會。
咱若無意識著對囡仔講台灣話的自信，kan-ta對序大人講，少子化的現此時，台灣話流失的速度是光速咧進行，到尾，Tâi-oân魂極加chhun氣絲仔，中國話全面佔領台灣人ê心kah靈，袂記得Tâi-oân人應該講ê 話，是Tâi-oân話...
閣，「看台語kan-ta會當學講台語，無路用」的刻板印象，深入人心。
咱對囡仔講台語，晟養ê囡仔，毋但是講台語ê囡仔。「咱」晟養的，是Tâi-oân囡仔。
學世間萬物ê智識，毋是kan-ta會當用中國話學，所有的語言，攏會當學專業智識，咱的Tâi-oân囡仔敢有法度？當然會使！真簡單，百工百業的人，攏對囡仔講台語，咱就會生湠濟濟Tâi-oân囡仔！
咱愛有智覺，台語有路用！伊是Tâi-oân ê 魂，民族意識 ê 根基kah底蒂。中國教育體制刁意故kā打壓做無路用 ê mi̍h，這點也是咱對囡仔講台語 ài 意識著 ê 代誌。
---
台語詩得賞者頒獎kah唸詩，上少年的是一位15歲的國中少女，聲音輕柔好聽，有多情的魂。頭名是台中人青年寫二七部隊長Chiong I̍t-jîn(鍾逸人)sian-seⁿ，講「Tâi-oân-lâng, m̄-sī tiong-kok-lâng」，隊長人生上尾佇加護病房ê時，伊ê意志，猶原hiah-nī堅定！
這款Tâi-oân精神，咱攏ài繼續，對囡仔講台語，予伊延續落去。
Source: 對囡仔講台語-台中台語囡仔伴（2024/3/20轉貼）
|
